Gipuzkoako Foru Aldundiak eta Lazkaoko Udalak udal lokal bat doan uztea erabaki dute, Gipuzkoan sexu-indarkeriaren biktimei laguntza integrala emateko; Hariberria zerbitzuaren hirugarren zentroa izango da. Lazkaoko Udalbatzak atzo, urtarrilaren 29an, osteguna, onartu zuen lokala uztea, eta datozen asteetan sinatuko da hitzarmena. Baliabide berria Lazkaon kokatuko da azkenean, Goierri eskualdeko lurralde arreta sarea indartuz.
Lokala Hirigoien kalean dago, kalean bertan, eta 133,90 metro karratu inguruko azalera erabilgarria du. Akordio honen bidez, Lazkaoko Udalak dohainik utzi dio higiezinaren erabilera Gipuzkoako Foru Aldundiari, haren gaineko titulartasuna eta azalera-eskubidea mantenduz. Lagapenak 30 urteko iraupena izango du. Horrela, une honetatik aurrera, Gipuzkoako Foru Aldundiak ekipamendua egokitzeko eta zerbitzua ezartzeko behar diren izapide administratiboak hasiko ditu.
Maite Peña Zainketa eta Gizarte Politiketako foru diputatuak adierazi duenez, “egoitza berri honek sexu-indarkeriaren biktima diren emakumeei, haien senideei eta gertuko pertsonei arreta integrala emateko sarea indartuko du. Bere kokapenak eta ezaugarriek berretsi egin dute Donostian eta Arrasaten erakutsi dugun konpromisoa, zerbitzu hau herritarrentzat eta bereziki emakume biktimentzat irisgarria izatea, kalean egotea, erraz ikusteko moduan, eta herritarrengatik gertu. Horrez gain, hirugarren zentro honek, hasiera batean iragarritako lurralde oreka ziurtatzen du”.
Kepa Zubiarrain Lazkaoko alkateak azpimarratu duenez, “akordio hau apustu estrategikoa da gure udalerriarentzat, sexu-indarkeriaren aurkako borrokan dugun konpromisoa sendotzeaz gain, erakundeen arteko lankidetza ere indartzen baitu. Zentro hau Lazkaon kokatzeak Goierri eskualdeko biktimei arreta hurbilagoa, irisgarriagoa eta egokitua eskaintzea ahalbidetuko digu, ingurune segurua, konfidentziala eta beren beharretara egokitua ziurtatuz. Gipuzkoako Foru Aldundiarekin batera, urrats erabakigarria eman dugu laguntza integraleko eta diziplina anitzeko sare bat sendotzeko, emakumeei beren berreskuratze-prozesuan laguntza egokia bermatuko diena, eta, aldi berean, gizarte bidezkoago eta inklusiboago baten eraikuntzan aurrera egiten lagunduko diena, non pertsona guztiek beren ongizatea berrezartzeko behar dituzten baliabideak eskuratu ahal izango dituzten”.
Erantzun integrala
Hariberria zerbitzuak, aurreko bi egoitzek egiten duten bezala, arreta eskainiko du Gipuzkoako Gizarte Larrialdien Koordinaziorako Foru Zerbitzuarekin elkarlanean (SFCUS). Koordinazio horri esker, sexu-indarkeriari arreta emateko taldea mugitu egingo da esku-hartzea beharrezkoa den lekura. Sinergia horri esker, erantzun integrala, diziplina anitzekoa eta espezializatua eman ahal izango da, bai gertua berriak diren kasuetan, bai iraganean gertatutako sexu-indarkeriako egoeretan, biktimen eta haien ingurune hurbilaren izandako eragin traumatikoa arinduz.
Zentroak zerbitzu integral bat eskaintzea ahalbidetuko du, honako hauek bilduko dituena: emakumeen eskubideei eta aukerei buruzko informazioa eta orientazioa, errekukperazio-prozesuetan laguntzeko laguntza psikologikoa eta soziala, eta aholkularitza juridikoa biktimei behar dituzten legezko izapideetan laguntzeko. Zerbitzu horiek guztiak ingurune seguru eta konfidentzial batean emango dira, pertsona bakoitzaren erritmoak, erabakiak eta intimitatea errespetatuz, eta arreta hizkuntza eta funtzionalitate desberdinetara egokituz, sarbide inklusiboa bermatzeko.
Lazkao, behin betiko kokapena
Hirugarren zentroa Goierrin ezartzeko azterketa-prozesuan, baliabidea Zaldibian kokatzeko aukera aztertu zen. Hala ere, zerbitzuaren beharrak eta espazio erabilgarrien baldintzak zehatzago aztertu ondoren, azkenean Lazkao aukeratu da. Lokalaren azalera handiagoa, kalean duen kokapena, irisgarritasun-maila handia eta higiezinaren aukera funtzionalak erabakigarriak izan dira. Helburu nagusia baita arreta egokia eta segurua eskaintzea zerbitzua jasotzen duten emakumeen beharretara egokituko dena.
Harriberria zerbitzuaren datuak
Hariberria zerbitzuak 418 kontsulta jaso zituen 2025ean. Horietatik 165 biktimek egin zituzten zuzenean; 71 ingurukoek, senideek edo herritarrek; eta 176 profesionalek.
Artatutako kasuei dagokienez, Hariberriak 178 emakume biktima lagundu ditu guztira, 2024ko uztailaren 1ean abian jarri zenetik.